Ki wòl Sikològ nan sosyete a?

Ribrik sante mantal: CAP

Nan yon sans chak moun ka di li filozòf, paske chak moun konprann lavi-a nan fason pa yo. Nou ta di nan menm sans sa tou, tout moun sikològ. Paske Gen anpil sitiyasyon nan lavi nap mennen chak jou-a ki mete nou nan sitiyasyon pou nou mobilize yon kalite konesans ki nan domèn sikoloji. Si nap site pa egzanp: rekonfòte yon moun ki andèy, bay yon zanmi konsèy pou edel jwenn yon jòb, ankouraje yon moun ki pèdi gou lavi, elatriye... Nan ka sa, yo menm jan ak nan pakèt lòt ankò nou pa mansyone la, kelkeswa ou ta yon sikològ nan vrè sans moun ki etidye sikoloji oubyen yon moun ki gen ide nan domèn sa-a ou pa, wap toujou bezwen yon moun ki pou ede-w nan detrès sa yo. Se yon fason pou m ede nou konprann tout moun bezwen yon sikològ, e menm moun ki sikològ la bezwen yon lòt sikològ pou tèt pa li. 

Toudabò annou wè kisa yon Sikològ ye, epi kòman li egzese profesyon sila.  Yon moun vinn sikològ apre li finn swiv yon fòmasyon lisans pandan 3 oubyen 4 lane nan inivèsite epi fè yon metriz pandan 2 zan nan yonn nan branch ki gen andedan syans lan, sa ki fè de li yon ekspè. Ou ka rekonèt yon sikològ parapò ak respè li gen pou lwa ki nan kòd deyontolojik ki di me kijan metye a fonksyone. Kòd sa-a egzije pou pwofesyonèl la «respekte moun ki kliyan li a sou plan mantal, sa vle di konprann e kenbe sekrè enfomasyon lap livre bay nan kad tretman, tankou yon dwa ki pa dwe janm vyole, e se respè dwa sa ki fonde aksyon sikològ yo».

Sikològ yo travay nan tout domèn nan lavi a selon fòmasyon ak espesyalizasyon yo pou yo ede moun vin gen yon vi mantal ak sosyal ki nòmal e satisfezan.

Pou pwoblèm relasyon moun ak moun, ak pwoblèm afeksyon, lanmou, fanmiy, oubyen moun kap viv nan kay, marye elatriye, li ta enpotan pou yo konsilte yon Konseye konjigal e familyal pou li akonpanye yo pou jere pwoblèm yo ka ap rankontre.

Lòt Kayte pwoblèm tankou: gwo laperèz, kè sote toutan, strès san rete, chagren, konpotman dwòl, difikilte pou kominike ak moun, pou gen zanmi, ak lòt ankò ki sanble ak sa nou site la yo, ta dwe cheche rankontre yon sikològ ki espesyalize nan klinik sa vle di yon «psychothérapeute».

Nan sa ki gen pou wè ak difikilte nan travay tankou estrès travay bay, fatig toutan, difikilte pou travay nan ekip, pou òganize ak patwon oubyen moun ki sou tèt ou, pwoblèm sa yo ak lòt ki nan kategori sa a, mande entèvansyon yon sikològ travay.

Sikològ sa yo bay bonjan kout men nan oganize kesyon travay  sitou nan jere moun kap fè travay la mache.

Sikològ yo travay tou nan lekòl, parapò ak pwoblèm timoun, pwofesè ap rankontre. Yo patisipe tou nan jere sistèm pedagojik la an jeneral, ak nan rann lekòl la ranpli fonksyon l kòmsadwa. Nan ka kote timoun refize ale lekòl, pè pwofesè oubyen lòt bagay lekòl la, timoun ki pèdi nan kapasite yo, nan pèfomans ak randman yo te konn bay lekòl, timoun ki paka konsantre yo, mete sou sa timoun yap joure kreten, yo di ki paka aprann lekòl se kèk nan kategori espesyal ki bezwen sikològ akonpanye yo pou yo amelyore.

Anpil lòt sitiyasyon nan lavi a ka mete nou nan obligasyon pou nou cheche èd tankou si: Ou santi ou fatige ak lavi wap mennen an, ou mal nan tout kòw ak nan lespriw, tèt ou ap fèw mal toutan. Mete sou sa, siw te viv yon sityasyon twomatizan, tankou yon ka kote menm laviw oswa pwòch ou te andanje, epi ou ta santi ou kontinye ap viv sèn nan nan pansew, oubyen wap viv ak yon santiman echèk, osinon ou ta santi tout moun pa janm bon avèw. Si wap fè move rèv lannwit, ou paka domi, ou gen lòt twoub somèy, oubyen souvan ou santiw pou kont ou, antouraj ou toujou twouvew ensipòtab, se kèk nan siy ki ka vle di ou gen yon pwoblèm ki mande pouw ta jwenn èd. Siy sa yo ak anpil lòt ankò ka tradwi yon eta detrès sikolojik ki bezwen èd yon pwofesyonèl nan sante mantal.

Kontrèman ak sa anpil moun konn panse, se pa moun fou ki al wè sikològ, sa nou rele moun fou yo se kay doktè sikyat yo mennen yo.

 Sikològ la se moun ki nòmal men ki gen yon ti pwoblèm nan vi l ap mennen li la pou li ede’l, tande’l, konpran li konseye’l. Sikològ la pa menm ak yon doktè ki ap baw medikaman pou geri. Men li la pou edew jwenn solisyon ki nan ou menm, gras bonjan teknik ak metòd syantifik li pral mobilize nan rankont lap gen pou fè avek ou yo.

Nan sosyete modèn yo sikològ yo se pa yo ki demontrel, li vinn yon evidans pèsonn paka inyore. Paske tout kote ki gen moun gen plas pou sikològ. Men nan peyi Dayiti nou poko rive la toujou, non selman nou pa gen anpil pwofesyonèl sa yo, ti sa nou genyen yo nou pa entegre yo pandan gen lòt moun k ap eseye pran plas yo epi fè job yo a e yo souvan fè l mal. 

Pou kesyon, ki wòl sikològ yo nan sosyete a? Repons lan klè nou pap ka panse yon  sosyete ki ekilibre san nou pa entegre pwofesyonèl sa yo paske li klè se yo k ap ede nou konprann epi amelyore panse ak konpòtman nou.

Yo relem Robens DOLY yon apranti sikològ nan inivèsite Leta

Pou Centre d'Assistance Psychologique (CAP)