Komanw ka amelyore somèy ou !

«  Nou pase twaka vi nou ap domi. » 

Lè moun gen pwoblèm somèy pafwa doktè oblije bay yo medikaman, men li enpòtan pou w konnen kèk ti abitid ki byen itil pou ede w gen yon somèy nòmal. Paske se lè wap domi kòw ak tout mantal ou jwenn chans pou yo repare yo.  Sa vle di siw mal domi, oubyen ou pa domi ditou konsekans yo ap vini direkteman sou eta santew. Pou komanse sa pral lakòz ou pa vijilan, ou paka konsantrew epiw paka reflechi byen. Lè pwoblèm domi sa pèsiste alalong li pral baw pwoblèm memwa, fatig toutan, doulè nan tout kòw, gwo varyasyon nan emosyonw. Epi lè konsa ou pral devlope lòt maladi tankou sik, tansyon, depresyon, kolestewòl elatriye….

Pou anpeche tout dezagreman sa yo gen anpil strateji ou ka itilize pouw domi byen ak kenbe eta sante w : 

Fè spò : Anpil etid montre byen klè siw pase pi piti 30 minit ap fè spò 3 oubyen 4 fwa nan yon semèn ka amelyore kalite somèy ou. Menmsi ou paka fè gwo spò men ou ka privileje aktivite tankou, mache apye, naje, kouri bekàn... Men evite fè aktivite sa yo apre 7è nan aswè sa ka anpechew domi.

Anvironman w:

Somèy frajil anpil pou anpil moun, kidonk gen bagay ki ka antrave somèy ou tankou bri ak tanperati a. Li pi bon lèw domi nan yon anviwònman kalm epi yon tanperati ki anviwon 20 degre.

Sa ou dwe evite :

Lew pral domi evite pran bagay ki ka eksitew tankou kafe, dite, vitamin C, koka ak lot ankò. Menm jan tou evite pran alkòl ak gwo manje. Abitid tankou travay, manje, oubyen gade televizyon lèw kouche se pa bon abitid. Siw ap gade televizyon asirew ou chwazi yon program kap favorize somèy pranw.

Favorize  aktivite ki rilaks tankou :

• Li yon bon liv

• Pran yon bon beny ak yon ti dlo tyed 2 èdtan avanw kouche

• Etèn oubyen diminye limyè nan chanm ou…

• Koute ti mizik dous

Siw fè tout bagay sa yo ou wè apre 15 ou 20 minit domi pa pranw fè yon ti leve bwè yon ti dlo, li yon liv epi lèw santi siy ou gen domi ou kouche ankò. Chak moun gen siy somèy li, men jeneralman se baye, je pike, po je lou ak bann kèk lòt ki siyale somèy.

 Siw reveye granm bonè douvan jou, li pi bon pouw komanse aktivitew nan jounen an olyew rete kouche. Ou ka toujou fè yon ti kabicha oubyen tire kòw pandan rès jounen an sa ap pi bon pou ou.

Ak tout ti konsèy sa yo, nap swetew bon somèy !

C.A.P (Centre d’Assistance Psychologique)

Email: capsantemental@gmail.com

https://m.facebook.com/story.php?story_fbid=1310581842339397&substory_index=0&id=1262948493769399