Entre Les Pages: Kisa CapArt ye?
Schebna Bazile: CapArt se pwojè yon mouvman devlòpman sosyo-kiltirèl, se yon plan pou n remonte nan nivo jèn sou pwen ki regade nenpòt talan yo ka genyen.
Nou pati ak yon teyori ki di: si n ka lage enèji n nan kreyasyon, lespri n ap ase louvri pou l kapab konprann pou n kontinye grandi, nou dwe kreye yon anviwònman pou sa. Anbisyon CapArt se jwe sou kòd potansyèl yon jèn pou l rann li kont li dwe evolye yon kote ki merite l. E kote sa, se ou menm kòm jèn ki pou konstwi l. Lap klè, depi kote kreyasyon an wose, kilti a ap grandi ase pou chanje sosyal la tounen yon enperatif.
"Cap sur l'Art, on avance vers ce changement là".
ELP: Kijan nou konte pote chanjman sa?
SB: Fason pou n vanse sou chanjman sa a pa bay nou pwoblèm. Li senp ; n ap kòmanse ak sa n genyen. Lè n tap lanse, moun ki te akeyi ide a se te kèk jèn ki gen bon pwofil nan zafè teyat, dans, chan, ekriti, finans, oubyen ki sèlman bon sipòtè. Se moun sa yo ki "CapArtistes", pou Konya.
ELP: Jounen jodi a ki kote CapArt sitiye l nan pwojè li a?
SB: Nou nan premye etap pwojè a: n ap kreye yon baz. N ap monte yon kapital fanatik. Nap "fè" moun. Pa sèlman kòm espektatè men kòm tèt k ap travay. CapArt nan pwen kote l ap vann yon Ayiti. A chak fwa n soti, nou ekspoze kèk pwen ki dwe manyen lespri, kè, konsyans. Wi, se yon machandiz ki nan vitrin. Moun ap pase devan l. Men nou bay tèt nou objektif pou moun ki pase devan l yon sèl fwa mande retounen ankò. Pi gwo reyalizasyon an se lè espektatè yo fin bouke gade machandiz la nan vitrin, yo vin anvi achte l. Se pou l achte ase, pou li menm li tounen machann. Moun ki achte nan men l va tounen machann tou, jouk nou atenn yon pwen kote tout moun va gen pa yo. Nan yon moman (ki pa oblije pre), l ap vin tankou yon obligasyon pou chak grenn moun genyen l.
E pwodui nap vann nan, se yon Ayiti nan jan l ta dwe ye.
Nou pa pretann nou pran pi bon wout la. Nou sèlman ofri sa n genyen.
Nou kwè nan rèv, nou kwè nan travay. Moun konsa pa konn bloke nan wout.
ELP: Nou òganize plizyè aktivite deja, ki mesaj nou te vle voye bay piblik la?
SB: Nan "Kanson Fè, Chefs en Jupons, Langaj Lasigal, Rétro, Notre Père" , nou toujou ekspoze reyèl la. Ak dram, komedi oubyen "absurde"; teyat, dans epi mizik, nou toujou fè piblik nou pran konsyans sou yon lòt fason moun ka viv. Pa paske vi nou mete sou sèn nan pi bon. Men paske l ap fè w wè, sila w ap mennen an ka pi bon.
ELP: "Baboukèt" se dènye aktivite CapArt pou lane 2017 la. Pale nou de li.
SB: Baboukèt se yon pyès ki ofri n yon tablo sou fòm lavi an Ayiti nan lane 1960 yo. Penti a montre pati sosyal ak kiltirèl, ak karikati fanmi Valet.
Fanmi an parèt sou 2 jenerasyon; yonn ki chaje ak teyori ki pa ta dwe chanje, yon lòt k ap rekreye prensip sou lavi. Yonn ap pare tann lafen di monn, lòt la ap fè sa l kapab pou kolore lavni. Nan mitan yo, Nadette, yon sèvant, epi Pascale, gran sè Mme Valet 2èm jenerasyon an.
Nadette ak tout inyorans li, Pascale ak tout entelektyalite l. Nadette ki pa wè pi lwen pase sa je l ba li, Pascale kap monte ekip li pou defye malè ki poko menm pandye. Men l pa gen dwa sa. Règ jwèt la, se "je wè, bouch pe".
Baboukèt ap jwe ak yon kenzèn aktè. Se yon komedi ki gen sou plato l teyat, dans ak chan.
Yon fwa ankò, se yon tèks ekri e mete an sèn ak resous CapArt.
©Entre Les Pages
Aucun commentaire:
Write comments